'ഇനിയും': ഓഡിയോ, ട്രെയിലർ റിലീസ് മില്ലേനിയം ഓഡിയോസിലൂടെ; ചിത്രം ഫെബ്രുവരിയിൽ
കൊച്ചി: ജീവ സംവിധാനം ചെയ്യുന്ന പുതിയ ഫാമിലി എന്റർടെയ്നർ ചിത്രം 'ഇനിയും' (Iniyum) സിനിമയുടെ ഓഡിയോ ലോഞ്ചും ട്രെയിലർ പ്രകാശനവും കൊച്ചിയിൽ വെച്ച് നടന്നു. യദു ഫിലിം ഫാക്ടറിയുടെ ബാനറിൽ സുധീർ സി.ബി നിർമ്മിക്കുന്ന ഈ ചിത്രത്തിൽ പുതുമുഖങ്ങൾക്കൊപ്പം മലയാളത്തിലെ പ്രമുഖ താരങ്ങളും അണിനിരക്കുന്നു.
പ്രശസ്ത മ്യൂസിക് കമ്പനിയായ മില്ലേനിയം ഓഡിയോസ് (Millennium Audios) വഴിയാണ് ചിത്രത്തിൻ്റെ ഓഡിയോ റൈറ്റ്സും ട്രെയിലർ റിലീസും നിർവ്വഹിച്ചിരിക്കുന്നത്. മില്ലേനിയം ഓഡിയോസിൻ്റെ യൂട്യൂബ് ചാനലിലൂടെ പുറത്തിറങ്ങിയ ട്രെയിലറിനും മികച്ച പ്രതികരണമാണ് ലഭിക്കുന്നത്.
സിനിമയുടെ അണിയറ പ്രവർത്തകരും താരങ്ങളും പങ്കെടുത്ത ചടങ്ങ് വർണ്ണാഭമായിരുന്നു. നടൻ റിയാസ് ഖാൻ്റെ ഊർജ്ജസ്വലമായ സാന്നിധ്യവും പ്രസംഗവും ചടങ്ങിൽ വലിയ ശ്രദ്ധ നേടി. നിർമ്മാതാവ് സുധീർ സി.ബിയെ വേദിയിൽ ചേർത്തുനിർത്തി റിയാസ് ഖാൻ സംസാരിച്ചത് സദസ്സിൽ കയ്യടി നേടിയിരുന്നു.
ചിത്രത്തെക്കുറിച്ച്: അഷ്കർ സൗദാൻ, കൈലാഷ്, രാഹുൽ മാധവ്, റിയാസ് ഖാൻ എന്നിവർക്കൊപ്പം പുതുമുഖങ്ങളായ സനീഷ് മേലേപ്പാട്ട്, മാസ്റ്റർ പാർത്ഥിപ് കൃഷ്ണൻ, നായിക ഭദ്ര എന്നിവരും പ്രധാന വേഷങ്ങളിൽ എത്തുന്നു. ദേവൻ, ശിവജി ഗുരുവായൂർ, സ്ഫടികം ജോർജ്, വിജി തമ്പി, സുനിൽ സുഖദ തുടങ്ങിയവരാണ് മറ്റ് അഭിനേതാക്കൾ.
ചിത്രത്തിൻ്റെ കഥയും തിരക്കഥയും സംഭാഷണവും ഒരുക്കിയിരിക്കുന്നത് നിർമ്മാതാവായ സുധീർ സി.ബി തന്നെയാണ്. ഏങ്ങണ്ടിയൂർ ചന്ദ്രശേഖരൻ, ഉണ്ണികൃഷ്ണൻ തെക്കേപ്പാട്ട്, ഗോകുൽ പണിക്കർ എന്നിവരുടെ വരികൾക്ക് പ്രശസ്ത സംഗീത സംവിധായകൻ മോഹൻ സിത്താര, സജീവ് കണ്ടര്, പി.ഡി തോമസ് എന്നിവർ സംഗീതം നൽകുന്നു. കനകരാജ് ആണ് ഛായാഗ്രഹണം.
കുടുംബബന്ധങ്ങൾക്ക് പ്രാധാന്യം നൽകി ഗ്രാമീണ പശ്ചാത്തലത്തിൽ ഒരുക്കിയ 'ഇനിയും' ഫെബ്രുവരി അവസാനത്തോടെ തിയേറ്ററുകളിൽ എത്തുമെന്നാണ് റിപ്പോർട്ടുകൾ.
